April 02,2025
SMAUJATA – ARUSHA
Leo imekuwa siku ya matumaini na hamasa kwa Jumuiya yetu ya SMAUJATA! Mashujaa wetu kutoka Arusha wamefanikiwa kufikisha ujumbe muhimu kwa wanafunzi wa Shule ya Sekondari Ketumbeine kupitia Kampeni ya Mama Samia Legal Aid. Ilikuwa ni fursa ya kipekee kuongea na akili hizi changa, kuwapa dira na kuwafungua macho kuhusu haki zao msingi na umuhimu wa usawa katika safari yao ya elimu.
Kiongozi wetu shupavu alisimama imara mbele ya wanafunzi, akiwashirikisha kwa lugha rahisi na yenye nguvu kuhusu kutambua haki zao na umuhimu wa usawa katika kuimarisha mwenendo mzuri wa matokeo yao wawapo shuleni. Ilikuwa ni kama kupanda mbegu bora kwenye udongo wenye rutuba, tukiamini kuwa zitamea na kuzaa matunda mema katika maisha yao yote.
Lakini ujumbe wetu haukuishia hapo. Kwa hisia za dhati, tuliwagusa nyoyo za wanafunzi kuhusu kupinga na kukataa ukatili wa aina yoyote. Tulizungumza kwa uwazi, tukielezea madhara yake na kuwahimiza kuwa mstari wa mbele katika kulinda utu wao na wa wengine.
Msisitizo maalum uliwekwa kwa mabinti zetu. Kwa maneno yaliyochochea ari na matumaini, walipewa moyo kusoma kwa bidii na kutokubali kukatishwa tamaa. Waliambiwa waziwazi kuhusu umuhimu wa kuepuka mimba na ndoa za utotoni, na badala yake, kuwekeza nguvu zao zote katika kufikia ndoto zao za baadaye. Ujumbe ulikuwa wazi: Binti anapaswa kusoma na kufikia malengo yake makuu!
Hata hivyo, hatukuwasahau watoto wetu wa kiume. Kwa muda mrefu, sauti zao zimekuwa zikisikika kwa mbali linapokuja suala la ukatili. Leo, tuliwapa uhakika kuwa ukatili hauna jinsia, na wao pia wana haki ya kukataa na kupinga aina yoyote ya uonevu. Tuligusia jinsi serikali inavyozidi kuwa macho katika kumnusuru mtoto wa kiume ambaye ameonekana kusahaulika katika jamii. Ilikuwa ni ujumbe wa kutia moyo na kuwapa nguvu.
Siku ya leo huko Ketumbeine imekuwa ushuhuda wa dhamira ya SMAUJATA katika kuwezesha jamii na kuwajenga viongozi wa kesho. Tunaamini kuwa kwa kuwapa wanafunzi hawa elimu kuhusu haki zao na kuwahamasisha kupinga ukatili, tunajenga jamii yenye usawa, amani, na maendeleo endelevu.
Tunawapongeza Mashujaa wetu wa Arusha kwa kazi nzuri waliyoifanya! Mlipanda mbegu za matumaini na uhuru, na tunaamini zitatoa mavuno tele. Tutaendelea kuwa pamoja katika harakati hizi za kuhakikisha kila Mtanzania, bila kujali umri au jinsia, anaishi katika mazingira salama na yenye fursa.
TAARIFA HII IMETUMWA NA MWENYEKITI SMAUJATA ARUSHA SHUJAA TUNU.
