Tarehe 3 Aprili 2025 – KIBAHA
Jumuiya ya SMAUJATA (Shujaa wa Maendeleo na Ustawi wa Jamii) imedhihirisha tena dhamira yake thabiti katika kuunga mkono juhudi za kitaifa za kuleta maendeleo, amani na mshikamano. Mwenyekiti wa SMAUJATA Mkoa wa Manyara,Shujaa Philipo Sanka, alikuwa miongoni mwa viongozi na wananchi waliojitokeza kwa wingi kushiriki katika hafla ya uzinduzi wa Mwenge wa Uhuru Kitaifa, iliyofanyika kwa heshima kubwa mkoani Pwani tarehe 2 Aprili 2025.
Mwenge wa Uhuru, kama tunavyojua, ni alama tukufu inayobeba ujumbe mzito wa mshikamano wa kitaifa, amani endelevu, na azma ya maendeleo kwa kila Mtanzania. Ushiriki wa Mashujaa wa SMAUJATA kutoka Pwani na Manyara katika tukio hili muhimu unaonesha wazi jinsi SMAUJATA inavyothamini na kuunga mkono misingi hii mikuu inayotuunganisha kama taifa moja.
Kitendo hiki cha Mashujaa wa SMAUJATA si tu ishara ya uwepo, bali ni uthibitisho wa dhamira ya dhati ya jumuiya yetu katika kuchochea maendeleo endelevu na kushirikiana bega kwa bega na serikali katika kufikia malengo ya taifa. Tunaamini kuwa ujumbe unaobebwa na Mwenge wa Uhuru ni dira inayopaswa kuongoza matendo yetu ya kila siku kuelekea Tanzania bora.
Hafla ya uzinduzi wa mbio za Mwenge wa Uhuru ilifanyika kwa fahari katika viwanja vya Shirika la Elimu Kihaba, mkoa wa Pwani, na iliongozwa na Mheshimiwa Makamu wa Rais wa Jamhuri ya Muungano wa Tanzania, Dkt. Philip Mpango. Uwepo wa viongozi wengine wakuu wa serikali, akiwemo Mheshimiwa Waziri Mkuu, Kassim Majaliwa, Mheshimiwa Naibu Waziri Mkuu, Dkt. Dotto Biteko, na Mheshimiwa Waziri wa Nchi, Ofisi ya Waziri Mkuu (Kazi, Vijana, Ajira na Wenye Ulemavu), Ridhiwani Kikwete, uliashiria umuhimu unaopewa zoezi hili la kitaifa.
Mwenge wa Uhuru sasa unaendelea na safari yake katika mikoa mbalimbali ya nchi yetu, ukibeba kauli mbiu muhimu inayolenga kuwaelimisha na kuwakumbusha wananchi wote kuhusu umuhimu wa kushiriki kikamilifu katika Uchaguzi Mkuu ujao, unaotarajiwa kufanyika Oktoba mwaka huu, kwa amani na utulivu. SMAUJATA inaamini kuwa ushiriki wetu katika kuhakikisha uchaguzi unakuwa huru, haki, na salama ni sehemu muhimu ya kulinda tunu za uhuru na demokrasia.
SMAUJATA inawahimiza wanachama wake wote na Watanzania kwa ujumla kuunga mkono mbio za Mwenge wa Uhuru kwa kuhakikisha ujumbe wake unazaa matunda katika jamii zetu. Tushirikiane katika kudumisha amani, Kupinga vitendo vya Ukatili, kuimarisha mshikamano na kufanya kazi kwa bidii kwa ajili ya maendeleo ya taifa letu.
